NewsRecord Weekly Publication

Bantay Banat

Ni Rics Cañisarez

Sadya na ang politika

Manghina-ot lang kita nga dili mahitabo ning kasamok sa umaabot nga pinili-ay. Kini ra ba nga eleksyon, layo pa gani ang campaign period, duna nay mga tima-ilhan nga lahi ra kini nga eleksyon kay duna nay mga bata-bata sa mga politiko nga nagpasi-atab nga buhaton gayud nila ang kutob sa ilang mahimo para sa kadaugan sa ilang kandidato. Usa ka sinaligan sa dakong politiko nga akong amigo mihunghong kanako nga sa mga kabukiran ang ila kunong kampanya mao nga kon dili kuno mosuporta sa ilang kandidato, buak ang bagul-bagol. Kuyawa no? Naunsa na gud ni, naka-abot na di-ay dinhi sa ato ning mga kaliwat ni Ampatuan?

 **********

Nia say kandidato nga human sa pag file sa iyang Certificate of Candidacy dili kang kakita nga mogawas bisan na lang unta mopaila nga siya kandidato sa ilang partido. Ang gigamit niya mao ang iyang igsuon nga mokampanya para niya. Unsa man ni, Sir, kabahin ba kini sa imong strategy? Aron makadaginot sa gasto?

Bitaw, Sir uy, kana bang ikaw gayud ang mokampanya aron mailhan sa mga tawo kay sigon sa huring-huring ikaw ra ba matud pa ang pigaw nga kandidato sa inyong partido. Wala ka ba masayud nga ang uban nga kandidato karon moabot na ug bukid para magpaila-ila sa ilang kaugalingon? Pag mata na uy!

**********

Sus, sayo pa gani nagkalandrakas na!

Niay amahan sa usa ka kandidato nga nagbagulbol na kay gikasab-an siya sa usa usab ka kandidato nga murag langaw kay nakapatong sa likod sa karabaw mura na man hinuon ug karabaw ka daku. Gikasab-an ang amahan kay lagi matud pa, dili maayo ang performance ang iyang kampanya pabor sa iyang anak nga kandidato ug sa ilang partido. Sigon sa inpormasyon nga akong nadawat nga nangasaba ning maong kandidato bahin sa performance (may rason baya pod) kay nakadawat na kuno sila ug kwarta (diin gikan?) para sa unang salvo sa kampanya.

Sige lang, Mr. Amahan, dawata lang nang kasaba total, sige man ug dawat sa kwarta para sa kampanya.

**********

Pastilan ning mga politiko maayo gayud kaayong mobola sa mga botantes kay sa kampanya, sa ibabaw sa entablado, moyaw-yaw nga mo-ingon, "Kaming inyong mga suloguon andam motuman sa inyong mga gikinahanglan." Pero, kon mabutang na sa pwesto ang tawo na ang ilang suloguon. Busa, mga igsuon, sugdan na nato ug has-has kon kinsa niining mga kandidato karon ang mosulti nga may katumanan kay sa usa ka libo kanila pipila lang tingali kanila ang dili hilig sa bola-bola.

   **********

Ang handum sa mga pobre nga ginikanan nga makapa eskwela sa ilang mga anak aron makakuha ug kurso, pero unsaon man kon pigado? At least karon may katumanan na kay aprubado na didto sa kongreso ang House Bill 6219 sa third and final reading. Sumala sa maong balaodnon kadtong mga estudyanteng anak sa mga pobreng ginikanan pinasikad sa voluntary loan program makautang na sa bangko ug sa uban nga mga financial institution para pangmatrikula/pang-tuition. Apan maghulat una kita sa senado kon makalusot ba. Manghinaut lang kita.