Supak si misis

Bantay Banat

Ni Rics Cañisarez

Pastilan gayud ning politika daghan gayud ang mahitabo nga mabungkag ang pamilya, managhigala dili na magtinagdanay,managsuon magbungol,tungod lang sa politika.

Dinhi lang sa San Carlos may balita nga nadawat sa Bantay Banat nga ang bana nag-ambisyon nga mokandidato apan ang asawa sa pagkahibalo, nasuko ug mi-ingon nga kon mamugos kuno iyang bana pagkandidato, "Molayas ko!" Ang bana usab nga dili gusto ug kasamok mi-desisyon na lang nga dili na lang modayon.

Kinsa kaha ni siya nga buot mokandidato? Sayang usab no?

Tingali ang asawa nasayud nga tangason kaayo ang kadaugan sa iyang bana busa, kon magpadayon ang  mokandidato mag-usik lang sa kwarta ug kabudlay maayo pa nga atimanon na lang niya ang negosyo. Maayo man sad ang tambag ni Misis.
                                                                          **********

Kon kinsa man gani nga politiko/mga politiko nga mapalaron nga modaug niining umaabot nga bugnong lugaynon, manghinaut lang ako nga tutokan gayud ning atong City Hospital kay gawas nga kulang sa mga tambal kulang pa gayud sa mga kahimanan nga magamit para sa mga pasyente. Mao bitaw ning mga rason sa uban nga doktor nga i-refer ang kalabanan sa pasyente didto sa Bacolod kay wala kuno silay igong kahimanan nga gamiton para sa mga pasyente. Kon ang pasyente dengue ang sakit walay laing tambal kon dili i-refer na lang sa Bacolod.

Pero kadtong akong pag-umangkon nga batang gamay (dili dengue ang sakit) gi-admit diha sa City Hospital kay gihilanat ug gi-ubo, ang tambag sa doktor nga i-refer sa Bacolod kay pasuyopan ang baga sa bata kay daghan kuno ug tubig. Ang amahan ug inahan intawon nag siri-siri pangita ug kwarta aron madala ang bata sa Bacolod wala pay labot ang ambulansiya. Pag-abot sa hospital sa Bacolod, ang doktor mi-ingon nga, "Misis, indi ka lang matarantar kon mahadlok." Kaduha lang indyeksione ang bata pagkasunod adlaw, kaluoy sa Labing Makagagahum, nauli-an ang bata.

Usahay bitaw diha sa atong hospital, ang ubang doktor magpataka lang. Siguroha baya ninyo, doktor ha? Dili baya ikatingala nga mo-ingon nang mga doktor sa Bacolod nga, "Ano man nang inyo mga doktor dira sa San Carlos man?"

                      **********

Lain na karon ang patakaran ni Department of Interior and Local Government secretary Mar Roxas.  Kani-adto kining mga opisyal sa kapulisan kon gustong mopa-asayn sa usa ka lugar nga gusto niya, mangita lang ug usa ka dakong politiko nga mopadrino. Walay langan matuman tungod lagi kay lakas man nga politiko ang padrino. Sa panahon karon ni Secretary Roxas wala na ning mga padrino. Sa ato pa, kining uban nga politiko nga nagpakita ug gahum kunohay kay lagi poderoso pwede nang mopadaplin.

Hoy! Mga Sir, kon pwede lang pahigad na kamo ayaw na ninyo hilabti ang trabaho sa pulis. Nia man gayuy uban nga politiko nga hasta ang  trabaho sa pulis entrahan pa, nganong wala man magpulis? Nindot man gud ning politika kay sayon ra ang pangwarta.