NewsRecord Weekly Publication

Bantay Banat

Ni Rics Cañisarez

Plataforma de govierno

Angay nga hinumduman ug hinuktokan niining mga politiko karon nga samtang anaa sa pwesto magbuhat gayud ug kaayuhan kay sa panahon sa eleksiyon, maukit sa hunahuna sa katawhan ug sa balota ang imong ngalan ug dili gayud kalimtan.

Dili kini balak nga akong gitagik kon dili pahinumdom ngadto sa mga politiko nga walay nahimong kaayuhan sa katawhan kay ang gihuna-huna nga bisag matulog total panahon sa eleksiyon modaug lang gihapon. Dili baya sama sa balud nga kanunay lang mohalok sa lapyahan sa baybayon ang kapalaran sa politika.

Niining umaabot nga bugnong lugaynon, ang mga botante dili na mahisama sa balud nga molapya kanunay sa baybayon kay duna na may mga katugbang nga angay pili-an nga may igong panahon para sa kauswagan sa atong dakbayan. Ayaw ug pakyasa ang atong gimithing kalambu-an para sa dakbayan.

**********

Manghinaut lang ako nga sa umaabot nga bugnong lugaynon, likayan unta sa mga kandidato ang paglabay ug lapok ngadto sa ilang mga kaatbang ug kon mahimo lang unta nga mga plataforma de gobierno ang ihan-ay ngadto sa katawhan aron nga sila na mismo ang magdesider kon kinsa gayud ang angayan nga pili-on sa umaabot nga pinili-ay. Kon kini ang mahitabo, hayan nga walay kagubot sa panahon sa umaabot nga eleksiyon.

Okay lang ba kini sa mga kandidato?

**********

Ang nakaparat lang kay sayo pa kaayo ning mga intriga nga nakaabot diri kanako gikan sa mga kandidato sa oposisyon nga ako ug akong kauban naa na kuno sa payroll ni Congressman Jules Ledesma ug si Atty. Sammy Lezama, nga among publisher, hingtapon na kuno ngadto sa administrasyon.

Mao kini ang dakong sayop sa akong mga igsuon sa oposisyon kay dali rang motuo ug kutso-kutso. Naay pipila diha nga kaniadto nga diha pa sila sa administrasyon, misinggit ba kamo batok sa kang Jules Ledesma? Pero, Kami ug ako bati-on tibuok San Carlos ang akong pagwaldati ngadto sa mga kandidato sa administrasyon apan kamo nagpakahilom kay nibahag ang ikog unya, pasanginlan pa kami nga hingtapon sa pundok ni Jules Ledesma.

Dili kaha mo magmahay sa pagpakatap niining intrigaha? Hinuon, kining among pundok diutay ra man pero, kon molaban ug mga kandidato, hinugtanay ug tinud-anay baya.