NewsRecord Weekly Publication

Pikpik sa Abaga

Ni Henry Sandoval

Mga bag-ong nawong

Hapit nag-abot ang duha ka grupo sa politika niadtong milabay nga Octobre 5 sa opisina sa Commission on Elections-San Carlos City.

Alas 10 sa buntag ang grupo nila ni Jeffrey Hidalgo nga midagan sa pagka bise-mayor sa  San Carlos mipasa sa ilang Certificate of Candidacy (COC). Si Hidalgo mokontra sa kasamtangang Bise-Mayor, Edgardo Quizumbing. Suportado sila sa ilang pag-file ni kanhi Mayor Boy Baguio sa Calatrava ug sa duha ka kanidato sa pagka Board Member nga sila si Jose Maria Valmayor ug si Dick Dedicatoria.

Ang duha ka grupo, mosugot ug sa dili, adunay common nga mayor nga gidala nga si Mayor Ginggo Valmayor. Ang mga ngalan sa milabay nga mga semana nga nangguwa dili mao ang uban nga mi-file. Mga batan-on ug baghu-an kaayo sa natad sa politika ang anaa sa pundok sa oposisyon. Sama nila ni Merkado ug ni Aileen Gustilo ug Gabutero.

Aduna ba kayha kini impak sa publiko ang mga baghu-ay nga nanagan? Tan-awon nato sa sugod sa kampanya.

Mga alas 11 usab ang grupo nila ni Mayor Valmayor nga mi file sa ilahang COC. Kumpleto ang grupo gikan sa mayor hangtud sa mga konsehal.                             

Adunay duha nga bag-o nga napuli sa duha ka konsehal nga mihuman na sa ilahang termino. Ang usa si Engineer Clint Mansueto nga maoy nagdala sa construction sa usa sa pinaka-nindot nga terminal nga karon anaa na ang Ceres buses ga-parking ug ang mga jeepney para sa mga munisipyo. Sa akong nahibaw-an ang mga tindahan nga anaa sa tunga savings kana sa original nga project nga gitukod ni Mansueto.

Ang usa si Dr. Emmanuel Baguioro nga kanhi Chief San Carlos City Hospital. Ug nakita ninyo ang usa ka karaan nga punu-an sa mangga diha sa may stop sa Central dinha ang ilahang karaang balay sulod gayud sa may agianan sa tren. Si Baguiro giila namo na nga taga Big Tibuco ug siguro aning higayuna magkahiusa na sad ang taga Tibuko nga mosuportar kaniya.

Bisan pa man sa kalig-on sa grupo sa administrasyon dili sad makumpyansahan ang grupo sa pikas kay  masa kaayo ang dating aning mga tawhana. Ug siguro ko nga dunay maayo nga mosulti sa ilahang grupo sama ni Pastor Erie Mahinay nga anad na kaayo mosulti sa kadaghanan.

Sa grupo hinuon sa pikas anad na kini sila sa duwa sa politika. Hanas na kaayo ni sila nga mosulti. Sama ni Konsehal Dixon Yu.

Sa duha ka grupo mibalik pagdagan si kanhi konsehal sa panahon ni mitaliwan nang Roger Debulgado, si Amay Lezama. Hanas na sad ni kaayo sa pamolitika ug gani niadtong miaging politika nakakuha kini siya ug kapin 16,000 mil ka buto dinhi sa siyudad sa San Carlos.

Ang wala lang makita ganina mao si Board Member Nene dela Cruz ug si Congresman Jules Ledesma nga maoy labing giistoryahan sa bisan asang sulok sa San Carlos. May moingon nga, "Wala na, daog na gayud si Nene dela Cruz aning eleksyona."

Pero ang uban sad nangutanag asa man dapitang anggolo nga mudaog si Nene?  Sa lima duha lang ang mayor nga anaa kaniya. Si Jules tulo ka mayor ang iyaha, ang Escalante,  Calatrava, ug San Carlos. Tulo ka dagkong yutaan nga adunay control nga maoy nakapalig-on sa maong grupo.

Abi nakog ang pagguba sa dalan diha sa may Small Tibuko mao na ang sinugdanan sa pagbag-o sa atong dalan. Dili man diay. Gigabas unya gikalot katong duna nay lungag ug buntod-buntod na. Pagkahuman gitabunan ug dakal-dakal dayun tabon ug aspalto. Tan-awa ra gud murag mga tinapakan nga dagko kaayo ang gitapak.

Naunsa man na uy? Nganong wala na man lang na tibuk-a ug ilis nang dalan nato?

Ug dali ra sad na kaayong mobudlot tungod sa dagko kaayo nga mga trak sa tubo ang muagi gikan sa Oriental. Walay limit sa tonelada nga ikarga sa maong mga dagkong trak. Dili gihapon na magsilbi kay wala may limit ang ikarga sa dagkong trak. Unya sige lang sad tag tapak ani.

Unsa kayha ug butangan ug pila ka tolenada ang makaagi ana atong dalan sa National Highway para nga muluntad ug dugay ang maong mga dalan?