Ni Rics Cañisarez
Ang baho ug si Goliath
Misi-aw na usab ning sakit sa San Carlos Bioenergy Inc. Kon sa tawo pa, miawas na usab ang apdo. Unsa man, wala na ba gayuy mahimo nang mga tawo diha kon unsaon sa pag-control nianang bahong baklag? Niadtong pila na kagabie ang milabay mi-awas na usab nang inyong tambakanan sa baho nga miabot na gani sa kalsada ang hugaw hinungdan gani nga miitom na ang dagat diha sa Parola ug hinungdan nga ang katawhan mi-alma tungod sa bahong dili maagwanta. Unsa man taga SCBI, sigehon lang ba ninyo kini? Ka wala baya ninyoy kaulaw!
Ug kon dili man gayud ninyo tagdon kining problemaha mas maayo tingali nga akong awhagon ang taga San Carlos nga gamiton na lang tingali nato ang People's Initiative. Hinuon ang People's Inititive kontra sa political dynasty, nagkinahanglan pa ug 10 porsyento nga pirma sa mga registered voters lukop nasud ug dos porsiento lamang nga pirma sa katawhan sa matag distrito ug ang COMELEC na ang mo-verify sa mga signature sa mga tawo nga supak sa political dynasty.
Pero, sa People's Initiative nga atong gamiton, wala na tingali angay pang pila ka porsyento ang kinahanglan kay sa petition nga atong himuon pirma lang sa mga tawo unya atong ipadala sa kalihim sa Department of Environment and Natural Resources sa kang Ramon Paje. Kay kon dinhi lang nato ipadala sa chairman sa Committee On Environment wala gayud kitay mapaabot kay modepensa man hinuon sa SCBI. Unsa man, sugdan na ba nato kini? Text lang palihug sa 0919-8284558.
**********
Nia pa gayuy laing problema, kining tubig nga atong gigamit nga kon mo-ulan malubog man! Natingala man ko sa mga taga-Waterworks Department kon unsa nga tubig ang ilang gigamit. Ah! Husto mineral water kay dili man makakita sa lubog nga tubig kon mo-ulan.
Engineer Edward Sanchez, sir, panahon na tingali nga mangayo ka ug budget sa kang mayor aron mailisan nang mga daan nga tubo aron dili na maka-sip in kanang tubig nga hugaw sa mga daan nga tubo kon mag-ulan.
**********
Kon ato gayung tumanon ning lagda sa COMELEC, nagpasabot nga ang kada kandidato para sa umaabot nga pinili-ay sa tuig 2013, magbaton lang ug duha ka bodyguards. Pero, sa akong nakita karon, bisag wala pa gani ang campaign period duna nay uban nga kandidato nga mokampanya magdala na ug ubay-ubay nga bodyguards nga armado ug mga tag-as nga kalibre sa armas. Gawas sa pipila ka pulis, duna pay Army naa pa gayuy kuyog nga nagdala ug armas nga high powered. Dili ba kaha makuyawan ang mga botante niini? Hinuon, trabaho na kini sa COMELEC.**********
Maayo man sad ning uban nga kandidato, no? Kay human sa pagpaila sa ilang kaugalingon, mohangyo sa mga tawo ug moingon, "Nong/Nang tabangi intawon ko ninyo kay kon modaug ko walay kinutuban ang akong pagserbisyo kaninyo." Duna say uban nga mohangyo nga tabangan kay kon magmadaugon motabang sa mga estudyante nga kabus nga makahuman sa ilang pagtuon. Nindot kaayong paminawon kon matuman man gayud pero, niay usa ka kandidato nga kon moatubang ug mga tawo mo-ingon nga iya kunong tay-ugon ang San Carlos. Si sir uy! Kinsa man ka si Goliath? Sa usa ka bagay tingali matay-ug ang San Carlos kon imong pabaha-on ang kwarta sa siyudad sa panahon sa eleksyon. Dili ba kaha tikal lang na ang imo, sir?
No comments:
Post a Comment