NewsRecord Weekly Publication

Bantay Banat

Ni Rics Cañisarez

Kandidato ug dentista

Nag-anam na kaduol ang campaign period alang sa umaabot nga pinili-ay ug nagsugod na usab ang mga bagay nga unta likayan sa mga politiko ug ang mga hitabo nga maka-apekto sa ilang kandidatura. 

Kining nahitabo sa usa ka kandidato sa pagka mayor sa lungsod sa Calatrava hinuon, sa akong pagtan-aw murag walay bulok sa politika. Palitiki kuno ninyo kining report nga akong nasagap gikan sa maong lungsod. 

Nahitala sa Police Blotter sa PNP-Calatrava nga kini si Jose Elvie Era, Barangay Kapitan sa Barangay Menchaca mi-report sa kapulisan ug mi-alegar nga niadtong mga alas 7:30 sa gabie niadtong November 3,  sa barbecue stand atbang sa merkado publiko samtang nanihapon sya, usa ka naghingalan ug Fernando Leonor, alyas "Pecdoy" nga walay hinungdan ug probokasyon milubag sa iyang li-og. Si Pecdoy mi-ingon: 

"Ayaw na ug tanom didto sa tagda ha? Ikaw diay naggasto sa ning-file ug kaso nako sa labor. Wala ko mahadlok mangamatay ta, kap kay tigulang nako." 

Ayaw intawon Sir uy, kahadloki ang kamatayon kay kandidato ra ba ka. O, diba walay bulok sa politika? Pero, mga suki namong tigbasa, kon ikaw kandidato (sa pagka-mayor pa ra ba) dili ba kaha kang kapugong sa nagdilaab nimong balatyagon?

     **********

Kon atong i-define ang political dynasty nagpasabot nga walay usa sa mga paryente si Presidente Noynoy Aquino sa gobyerno. Tataw nga gidili gayud sa atong Constitution ang political dynasty apan, gumikan kay walay enabling law, kining political dynasty giyam-iran na lang hinuon sa mga dagkong politiko. Mas maayo tingali nga panahon na nga atong gamiton ang People's Initiative aron mawala na kining political dynasty.

**********

Kataw-anan tinuod pero, mao kini ang kamatuoran nga bisag unsaon ug banat kining San Carlos Bioenergy Incorporated (SCBI) gumikan sa polusiyon nga labing baklaga, manabon lang sa ilang nawong. Dili makabatyag ug kaulaw sa katawhan (ambot ug ngano?).

Kon moabot na gani ang kapistahan sa atong dakbayan, kada kaadlawon gayud ang awrora. Usa niana ka higayon, ang awrora didto sa Barangay I. Sa sulod sa kapilya didto nagguot ang mga tawo ug ang uban nagdala ug mga polungkuan. Sa wala pa magsugod ang Misa, daghan ang nakapanimaho busa, may miisa sa iyang tiil ug gitan-aw ang tikod sa sapatos kay nagtuo nga may natumban sya nga hugaw sa tawo, sa iro o kaha sa iring. Halos ang tanan nangutana kon unsa katong bahoa ug nasayran lang nga baho diay gikan sa SCBI. Labihang bahoa gayud kuno. 

Unsa man mo diha, taga SCBI, wala na ba kamoy kaulaw sa katawhan? Tinuod nga dili kita gusto nga serhan ang SCBI tungod kay lagi nakatabang baya sa atong ekonomiya pero, kon mao man lang nga mag-agwanta ang mga tawo sa kabaho nga labihang baklaga, mas maayo tingali nga mang resign nang mga tawo diha nga in-charge sa pollution control, kay mga INUTIL mong dagko!

                        **********

Sakit baya gayud kon ang daot nimo nga ngipon ibton bisan ug gamitan ug anesthesia. Mas mosamot ang kasakit (sa imong bulsa) kon ang dentista nga moibot sa ngipon usa ka kawani sa gobyerno nga mosukot nimo ug tag 

P 1,000 kada ngipon, unya ang resibo nga gamiton para kunohay sa iyang serbisyo ginama sa kartolina. 

Usa intawon ka pobre nato nga igsuon ang miduol niini nga government dentist aron mopaibot sa iyang daot nga ngipon. Ambot kon gi-unsa pagsabot nga sa duha ka ngipon P 2,000 man ang gi-charge. Gibayran intawon sa pobre unya ang resibo ginama lagi sa kartolina. Human sa usa ka ngipon nga giibot, mibalik ang pobre aron ang usa na say ipaibot. Nangutana tingali ang pobre kon ngano nga tag P 1,000  ang sukot niya sa maong dentista nga sa uban nga pribadong dentista tag P 150 ra man? Nakabatyag tingali, gikuha sa maong dentista ang resibo gikan sa tag reklamo ug gi-uli ang kwarta ngadto sa pobre. 

Hala Doc, dili na lang ko nimo mo banat kay imo mang gi-uli ang kwarta pero, sa sunod kon imo pa kining usbon dili ka tingali magmahay.