Pikpik sa Abaga
Ni Henry Sandoval
Tabang!
Sa mga senador ang pork barrel o Priority Development Assistance Fund (PDAF) nga ilahang budget para sa mga proyekto nga ilahang mahatag sa mga probinsya o lungsod labihang dagkua.
Ug gani usa ang San Carlos sa nahatagan sa pork barrel ni Senador Edgardo Angara ug P 5 M para sa pag-develop sa Agriculture Site diha sa Medina, Barangay Rizal. Karon ang opisina sa City Agriculturist anaa na mahimutang sa maong site. Usa sa mga senador nga wala mudawat ug PDAF si Senador Panfilo Lacson kay usahay gud ang dagko nga isyu dinha man magikan anang kwartaha nga gihimo ug mga proyekto sa nagkalain-laing dapit sa Pilipinas.
Sa mga kongresista, ang mga ahensya nga adunay proyekto mo-request ug funding para pud sa ilang mga kalihukan. Sama sa mga dalan nga ginatrabaho, kini request gikan sa Department of Public Works and Highways. Daghan kaayo ang matabangan niining maong allocation nga gigahin sa Kagamhanan Nasyonal ngadto sa mga napili nga mga kandidato nga moserbisyo sa ilahang mga lugar.
**********
Pero abi nakog didto ra na sa Senado ug Congress ang maong mga Pork Barrel. Karon lang bag-o ko nakahibalo nga ang ato diay mga konsehal dinhi sa siyudad sa San Carlos aduna sad diay ni silay Pork Barrel. Sa source nga akong nahibaw-an ang kada konsehal adunay alokasyon nga
P 250,000 sa matag area nga diin sila ma assign.
Pastilan naa man diay na. Manghinaut unta mi sa mga konsehal nga na-assign sa among lugar nga basin iyahang ma-budgetan ang among Waiting Shed diha sa Tibuko kay ang karaang Waiting Shed diha nga proyekto pa ni kanhi Barangay Kapitan Eliseo Ejercito nabungkag naman tawon atong nanlabay nga bagyo.
Ug tungod lagi nga walay lain nga kapasilungan ang mga nag standby diha dapita gitabangan sa mga tawo dinha nga mubarog pagbalik pinaagi sa pag-amot amot ug kahoy ug daan nga mga sin nga i-atop niini.
Ug dili ba kayha magahinan nang dalan namo diha dapit sa D.C. Cruz pasulod ngadto na sa Kaingat nga labihan gayud intawon ka lubaong nga dalan. Sa hinay-hinay siguro ug ang maong Pork Barrel sa mga konsehal matagaan ug augmentation sa syudad masemento gayud na dinha. Ug dili ba kayha kanang dalana labihang ngitngita ug mosulod ka panahon sa kagabhi-on. Matagaan diay nag pagtagad, hinayhinay mahayag na diha. Hangyo lang gud na basin pa diay.
**********
Bilib sad ko aning contractor nga anaa karon gatrabaho sa atong dalan diha dapit sa Tibukong Gamay. Labihang kusoga nga mokalkal ug dali pud kaayo nga mutabon sa ilahang gikalot. Ug sa lugar sa highway nga diin ilahang gikalot makita nimo nga humok kaayo ang yuta sa ilawom nga mao say hinungdan nga dali kaayo mahimong bangag-bangag ang atong dalan.
Karon makita nimo nga giilisan nila ug mga yuta ug ginakompres dayun nila kini. Apan ang nakapikal kay bisan sa ilahang pagpaninguha nga magmaayo kini atong dalan wala say puangod ning dagko kaayong trak nga tag-as kaayo kargado pa.
Murag sa akong tan-aw ug mahuman ni nila ug espalto dili sad ni maabtan ug upat ka bulan molikoy na usab ang maong dalan nga ma-espalto.
No comments:
Post a Comment