Ni Rics Cañisarez
Meeting sa SP ug SCBI ra
Daghan na karon nga taga San Carlos ang nag-ingon nga ila na lang kuno pasulabihon ang bagyo kon itandi niining bahong baklag nga ilang gipanimaho halos kada adlaw ug gabie. Ang ilang rason kini kunong bagyo agi ra pero, kining baho sa tibuok San Carlos nga gikan sa ethanol plant halos matag adlaw ug gabie na. Ang dili lang makapanimaho kadto lang tingaling tawo nga walay lungag ang ilong.
Gani, kanang mga tawo nga nagtrabaho diha sa SCBI walay lungag ang mga ilong, kay dili man makapanimaho. Sobra na gayud ning gibuhat nila sa mga taga San Carlos. Busa, bisag pila pa ka press release ang inyong ipamantala, dili na motuo ang mga tawo.
Daghan ang nagtuo nga dili na gayud mawala ning bahong baklag dinhi sa San Carlos. Mawala lang kini kon mawala usab nang SCBI. Ako na lang awhagon ang mga tawo nga mag rally kitang mga naapektuhan sa baho gikan sa SCBI kay kon ipaagi pa sa petisyon dugay pa kana mas maayo pa tingali kini nga paagi aron maundang nang operation sa SCBI. Nia say atong City Health Office, nangatulog lang pero, kon dunay tawo nga moreklamo sa ilang buhatan kay ang silingan nagbuhi ug baboy ang hugaw nanimaho, automatic mopadala dayon ug tawo ug mopahimangno nga dili na magbuhi ug baboy kay ang mga silingan mahasol sa kabaho. Pero sa baho sa ethanol, dili gayud mopakita ug aksyon, wala say mga lungag ang mga ilong. Kanus-a kaha lipakan ning SCBI no?
**********
Ngano usab kaha nga nakakuha man ni sila ug Environmental Compliance Certificate? Gi-unsa man ninyo ang DENR? Gibusog ba ninyo pag-ayo? Karon unsay resulta, ang mga tawo nga manawag diha kaninyo manunglo na kay kon inyong tubagon ingnon mo nga, "Mayrag mangamatay mo diha." Mao na kini ang lintunganay sa inyong dili pagtagad sa mulo sa katawhan. Para nako, kay minilyon man kaha ka pesos ang gastuhon sa usa ka semana aron mahunong kanang bahong baklag nga pollution, maayo pa ug serhan na ninyo nang SCBI ug kanang mga maayong laki diha nga nagsige ug pagarpar maayo pa ug motrabaho pagka embalmer kay dili man lud-on sa bahong baklag.
**********
Ang nahitala nga paglambo sa atong ekonomiya (economic growth) niini nga third quarter ug ang stable nga presyo sa mga pagkaon lukop nasud wala mabatyagi sa mga minilyong Pilipino nga kabus. Kining pag-usbaw sa presyo sa mga basic foods nga halos dili na masarangan, kinahanglan ug dinali-an nga pa repaso sa atong policy ug dapat usab nga i-implementar ang corrective measures sa samang higayon aron ang mayoriya sa katawhan makatagamtam sa bunga sa nahitala nga economic growth niining tuiga.
Ang 7.1 percent nga economic growth naglangkob ba kini sa unemployment rate ug sa malnutrition sa mga kabataan nga maoy labing tataw nga kamatuoran sa ilang giingon nga economic growth ug ang tinuod nga kahimtang sa panginabuhi sa mga igsuon natong Pinoy. Kanato nga taga San Carlos, nakabatyag ba kita sa 7.1 percent nga economic growth?
**********
Sa negosyo bentaha gayud diay kon dunay kompetensiya. Karong panahona ang presyo sa gasolina maglaob-laob, usahay motaas ug bale piso ang kada litro, mous-os pero, ngadto ra sa 25 sentabos. Malipay na ang mga motorist kon mukonhod ngadto sa 50 sentabos ang litro. Karon dili na tingali maghulat ang mga motorista kon kanus-a mukonhod kay kining bag-o nga natukod nga gasoline station (hulata lang ninyo kon mo-operate na) kay sigon sa tag-iya, kon dunay uban nga gasoline station nga nag-offer ug discount nga piso ang litro ngadto sa mga PUJ ug PUB, ang Laguda Gas Station mo offer ug bale dos pesos matag litro sa tanang salakyan, bisag walay sakyanan basta magdala lang ug sudlanan.
So, bentaha kini sa mga motorista. Maayo gayud diay kon may kompetensiya, diba?
**********
Kinsay magdahum nga mapuno sa tawo ang SP Session Hall niadtong adlaw nga Martes, Disyembre 11. Gani nga murag gihilum ang pagpatawag sa mga konsehal sa pagpanguna ni SPM Momoy Debulgado nga mao ang SP Chairman sa Committee on Environment and Natural Resources ug ang mga dinapit nga taga SCBI, kay kon gipahibalo ang mga tawo hayan nga maghuot ang Session Hall. Walay laing topiko ang gihisgutan magluwas sa pollution nga bahong baklag gikan sa SCBI. Kon nganong niadto nga halos napuno ang session hall, tungod kay ang katawhan dili na halos maka-agwanta sa bahong baklag. Ako diayng pasalamatan si SPM Mascuñana sa pagpanalipod sa katawhan sa San Carlos batok ning baho gikan sa SCBI ug mi-suggest pa gani nga ma-open forum para at least makapangutana ang mga tawo.
Ang observation report sa atong City Health Officer si Doctor Portugez bahin sa mga sakit karon sa mga tawo, bata o matigulang, sa mga lugar nga apektado sa pollution hinuon, matud niya nga ila pang gi-obserbahan. Tungod niini ang SCBI nangayo gayud ug public apology kay matud nila nga ila gayung gipaningkamotan nga sa Enero 31, 2013 mahagan-hagan na kuno ning bahong baklag.
Kon duna man gayud, sila na lang kuno diha sa compound ang makapanimaho. Bitaw, mga Sir, siguroha baya gayud kay kon baho-baho lang gihapon ang lukop siyudad, usa ako nga manguna sa rally paingon diha sa SCBI nga mohangyo nga stop operation usa mentras gi-ayo nang inyong kahimanan para sa pollution control.
No comments:
Post a Comment