Ni Henry Sandoval
Akong tubag sa PR
Ang sulat nga gikan sa San Carlos Bioenergy Inc. kon ethanol nga nangayo ug pasensya sa katawhan sa San Carlos mahitungod sa usa ka insidente nga nahitabo, ang pag-awas sa tubig sa ilahang punong sa hugaw diha sa sulod kaniadtong Nobyembre 13.
Matud pa sa nagpadala kini tungod sa dako kaayo nga ulan ug nadunganan usab sa pagtaas sa taob sa dagat nga maoy naka resulta sa baho kaayo nga mahanggab sa mga tawo. Kinsa man ang gagmay nga pumuluyo nga dili makadawat sa pasensya? Pero ang ulan ba ug ang pagtaas sa dagat maoy tinuod nga hinungdan sa perting bahoang baklag nga diha gikan sa SCBI? Dili siguro mga Sir ug Madam nga naa ga trabaho diha. Dili man mi mga batang gagmay nga patuhu-on nga tungod sa maong insidente nga mibaho pag-ayo ang kahanginan.
Tan-awa ug unsay nahitabo sa Purok Kainggat, nagkagubot kay kalit lang mipula ang dagayday sa tubig sa sapa. Miulbo ang baho nga halos na lang sila mosuka sa kabaho. Natingala sila nga kalit man lang mipula ug mibaho ang tubig. Intawon ang mga maayong laki didto man mibubo ug hugaw sa ibabaw ug didto miagi sa sapa nga kanang sapaa diha gagamit ang mga tawo sa pagkaligo ug pagpanglaba.
Matud pa sa akong nahinabi ang mga ulang nang lukso sa kabaho. Labihang hugawa ug labihang pulaha. Apektado ang tanan nga pumuluyo sa kanindot sa giyabo anang mga maayong laki diha sa maong kompaniya. Unsa may giabonohan ninyo sa sapa? Didto sa dagat padulong ang maong hugaw nga gibubo sa ethanol ug ang naapektuhan ang resources sa dagat. Ngano? Ang nanginhas puno ang plastic nga gisudlan sa kinason. Wala kaagwanta mitunga murag nahutdan ug hangin sa ilawom.
Asa naman tawon mong taga DENR? Dili sad ko motuo nga wala mo makabantay, makahibalo, makadungog, makakita sa panghitabo kay naa ra man na sa inyong tungod. Katong sampol nga inyong gikuha sa dagat nga kuyog ang mga Barangay Opisyal sa Barangay I, unsa na may natabo ato?
Athagi pud ang tawo sa San Carlos ug unsa nang klase sa hugaw nga miguwa dinha sa ethanol. Kay ug dili makadaot kamo gayud among patestingon ug kaligo diha sa ka Preking kanang mobubo na ang ethanol sa ilahang hugaw ug dili ba mo kagiron.
Didto sa San Carlos City Hospital niadtong milabay nga semana nga mo-interview unta ko ni Jocelyn Chan mahitungod sa 'NOCHIPS' nga programa sa probinsya wala ko maka-istorya kay matud pa sa akong nahinabi naa ang taga DENR nag-inspeksyon. Abot gani mo diha kana pang naa sa inyong tungod.
Unsa pa kayhang lugara dinhi sa San Carlos ang wala maabot sa bahong baklag nga gikan sa ethanol?
Sayang ang pag-anhi ni Migs Zubiri ang gibansagan nga nagmahal sa kinaiyahan. Sayang nga wala siya mobisita sa ethanol para sad unta makatagamtam siya sa kahumot sa kinaiyahan. Ug sa ako pang kauban may kampanya man. Sa City Hall ug moatake na ang baho nga gikan sa hanging amihan mapulos na lang bagolbol sa kabaho. Panahon na unta ning muapil sa mulo sa kinabag-an para makakita ta ug insaktong solusyon sa problema.
Tinuod nang gatusan ka milyon ang gastoson aron ma minos minosan ang baho diha sa maong central apan miganar man sad sila sa maong negosyo. Kay ug wala pa na muganar dugay ra nang misukarap ug misira. Matud pa sa ilahang sulat andam sila sa ilahang pagtabang sa mga tawo nga naapektuhan. Ang gipaguwa nga istorya sa sulat sa SCBI dinhi sa News Record nga ang ilahang kompaniya naninguha nga ma reduce ang waste water by 30% para dili na kaayo mobaho. Misamot man hinuon ni kay kada adlaw perti naman hinuong bahoa bisag init ug ulan. Usa pa gayud sa dili na ko masabtan nga ang barangay mao man unta ang gagmay nga gobiyerno nga gitahasan para sa pagpaminaw ug paghatag ug aksyon kung unsa na ang nahitabo sa sulod ug sa daplin sa iyahang barangay mura mag wala magtagad.
No comments:
Post a Comment