Ni Rics Cañisarez
Bodyguards sa kampanya
Unsa na man ni? Mura na man ug campaign period na kay, ang uban nga mga kandidato nagpakita na man sa 'show of force' atol sa ilang kampanya sa mga barangay ug dinhi sa siyudad. Ang balibad paila-ila kunohay pero, baya dala ang lamano, pik-pik sa abaga, ug hung-hong nga, "Basi baya ug malimot mo kanamo karong umaabot nga eleksyon…"
Unsa man ni? Dili ba kini pangampanya na? Ang laksot pa gayud nga tan-awon kining ilang mga bodyguards nga puwera buyag lang mga high powered firearms na man ang mga dala. Ambot kon na monitor ba kini sa Commission on Elections.
**********
Bisag tabangan pa natog hingos ning bahong baklag gikan sa San Carlos Bioenergy Inc. (SCBI) dili gayud mawala. Kamo diha sa SCBI labi na gayud ni-anang in-charge sa pollution control, kon dili man kamo makasarang pagsanta ni-anang baho nga baklag hala, pang resign na lang mo diha uy! Gikan kaniadto hangtud karon baho ra mo gihapon. Siyaro, gikan kaniadto hangtud karon nga baho ang inyong pasangil mao ang kusog nga ulan nga moay hinungdan nga mi-awas ang intong waste pond unya karon kay wala na may ulan nganong misamot man hinuon ang kabaho?
Lahi na kining bahoa karon kay hasta na ang mga kinhason sa hunasan nangamatay na lakip na ang mga isda. Pastilan usab ning taga Environment Department (DENR) katingad-an kay naa ra man unta sa atbang sa ethanol ang ilang opisina wala gayuy action. Tingali permi lang busog sa baho.
Laing ahensiya sa gobiyerno nga angayan manghilabot mao ang Bureau of Fisheries and Aquatic Resources (BFAR) kay apektado na man ang marine life ug fisheries. Kon sa Cebu pa kini nahitabo, dugay na unta gipaserhan kining SCBI. Diri dili gayud maserhan ang SCBI kay lagi daku kunohay ang natampo sa atong ekonomiya.
Bitaw, tinuod kana kay karon daghan na ang namalit ug mga surgical mask bata ug mga tigulang kay dili ma-agwanta ang kabaho ug daghan na usab nga ginikanan ang namalit ug tambal sa hilanat ug ubo sa ilang mga bata. Dili lang ko mamasangil tungod kini sa dili masabtan nga baho gikan sa SCBI pero sa pipila ka mga doktor nga akong nahinabi, mi-ingon nga panahon na nga molihok ang atong mga opisyal sa syudad. Intawon mga Sir ug Madam lihok na mo mentras sayo pa.
**********
Samtang atong gipa-abot ang mahimong resulta sa umaabot nga pinili-ay karong tuig 2013, nanimaho na usab ning eleksyon sa barangay sa bulan sa Oktubre 2013. Kon mahinayon, ubay-ubay na usab ang magpapili. Kadtong mga kapitan nga mo-expire na ang termino mopapili na usab sa pagkakagawad. Dili uroy pul-an ning uban sa pagkinabi sa kwarta sa gobiyerno nga wala may gipakitang serbisyo sa ilang barangay. Na kamo diha nga intresado paniid na!
**********
Milabay na ang katuigan ug karon lang nato nahibalo-an (kay misugid man) kining usa ka pedicab driver ug matud pa niya, nga may daku nga bag nga puno sa kwarta (kay iya mang gi-ablihan kon unsa ang sulod). Ug matud pa niya nga sa tibuok niyang kinabuhi mao pa siya kakitag kwarta nga labihang daghana nga nasulod sa usa ka bag nga daku nga nabilin sa iyang pasahero.
Kinsa kaha ang tag-iya sa maong kwarta? Matud pa usab niya nga wala siya makatulog kon kinsa gayud ang tag-iya busa, iya na lang kuno gibitay ang bag diha sa iyang kwarto ug nagpa-abot kon duna ba gayuy mangita. Nakalabay ang unom ka adlaw nakahuna-huna siya nga magpa-uban sa usa ka traffic enforcer aron mauli gayud ang kwarta sa tag-iya.
Aron makompleto ang detalye niining maong balita, akong gipaningkamotan nga makit-an ang traffic enforcer kon unsa gayud ka tinuod apan, matud niya nga iyang nahinumduman nga dili kuno bag ang gisudlan kon dili sobre lang kuno ug sa dihang nauli sa tag-iya gitagaan sa tag-iya ang pedicab driver ug P 500.
Maglibog ka kay, ang pedicab driver nag-ingon nga dakong bag gayud ang gisudlan sa kwarta samtang ang traffic enforcer mi-insister nga sobre lang, ug gawas pa, sa unom ka adlaw nga pag tipig sa kwarta sa pedicab driver sa bag nga puno sa kwarta ug sa ikapito ka adlaw nganong iya kunong na-ilhan ang tag-iya nga nagkaon sa usa ka restaurant ug didto gi-uli ang kwarta. Hain kaha ang tinuod? Maglibog ka, dili ba?
No comments:
Post a Comment