NewsRecord Weekly Publication

Pikpik sa Abaga

By Henry Sandoval

Kausaban

Ang auditorium maoy matawag nato nga sentro sa siyudad sa San Carlos. Gani sa pagtukod niini daghang isyu nga gilabay niini kang kanhi Mayor Debulgado. Matud pa sa mga misaway niini. Matud pa nila ohong nga puthaw sa San Carlos. Apan sa pagliso sa panahon ang gisaway nga ohong nahimong mapuslanon sa tanang okasyon labi na gyud ug panahon sa ting ulan.

Sa hinayhinay nga pag-irog sa panahon ang gitawag nga Rizal ug Bonifacio diha sa kilid sa auditorium nausab sa dihang si Mayor Valmayor na ang mikapot sa renda sa siyudad sa San Carlos. Nahimo na kining usa ka lolinghayawan sa pamilya. Adunay dako kaayo nga TV sa puesto ni Dr. Jose Rizal. Mga bata nga nagduwa sa plaza ug dunay gagmay nga negosyo pinaagi sa pagpa-abang sa mga dulaan nga magamit sa mga bata.

Sa lugar usab ni Andres Bonifacio tua usab ang duwa sa Volleyball ug Sipa Takraw nga maoy nahimong suroyanan sa mahiligon sa sports kay matag gabii ang duwa niini. Hasta ang nagproblema sa hospital anha na mopahungaw sa pagtan-aw sa duwa matag gabii. Kini nga mga talan-awon sa atong public plaza mga kausaban kini ubos sa administrasyon ni Mayor Valmayor. Unsa man jud diay ang angay nga himuon nga kausaban sa siyudad sa San Carlos? Siguro ang angay usbon mao ang batasan nga kanunay lang magsalig. Na halos na lang tanan isalig sa lain tawo. Anugon lang sa tima nga “ABANTE SAN CARLOS” unya kita sige lang magpatulod para makadagan.

***********

Petsa 12 ning bulan sa April 2013 nahitabo ang usa ka mass wedding didto sa Brgy. Prosperidad. Ang programa gidala kini sa Civil Local Registrar pinaagi sa opisina sa Brgy. Prosperidad. Sa akong paghinabi ni Mr.Nilo Chan, mga 23 ka parisan ang gikasal. Sa mga gikasal duna koy nakita nga paresan nga ang lakaki mga 80 anyos ug ang babaye mga 38 anyos ang edad. Matud pa ni Mr. Chan ang maong mass wfeding maoy una nga nahitabo sa Brgy. Prosperidad.

Si Mayor Valmayor ang mikasal sa 23 kaparesan. Ug siya mismo ang mihatag ug tambag sa mga gikasal nga pangga-on ang mga asawa ug ingon man ang bana. Sa katapusan nangayo ug pasalamat ang tanang gikasal sa kang Mayor Valmayor ug sa Team Unity nga mitambong sa maong okasyon.