NewsRecord Weekly Publication

Pikpik sa Abaga

Ni Henry Sandoval

Negosyante sa merkado, 

mi reklamo

Usa ka negosyante dinhi sa siyudad sa San Carlos ang mireklamo  sa iyahang gipadagan sa mga papeles sa lisensya sa iyahang tindahan. 

Si Mr. Antonio nga naa ganegosyo diha sa ilawom sa atong merkado publiko ug mga mantalaan ug mga magazine nga nasyonal ang natingala ug dako nga wala man gihapon ang lisensya sa iyahang tindahan nga nakabayad na man siya sa nagproseso sa maong mga papeles ug bali Php 19,000. Sa dihang mibatyag na siya ug duda iya kining gisusi sa City Hall ug iyahang nahibaw-an nga wala mabayad ang kwarta nga iyahang gihatag sa gatrabaho niini.

Ako siyang gipangutana ug nganong dako man sa imong bayranan nga mao man lang kato iyahang negosyo. Matud pa niya ang maong bayranan apil na ang mga penalty niadtong milabay nga tuig. Karon kuno tungod sa wala pagbayad sa maong kantidad didto sa City Hall nahimo kini niya nga dako nga problema kay dili man gyud siya makalukat ug lisensya ug dili mabayran ang mga penalty.

Matud pa niya nga kato gani kunong kwartaha gi-loan pa niya para mabayad niya sa gobyerno. Karon ang ilahang problema ila nang gisang-at ang reklamo sa Barangay VI.  Ug matud pa niya nga duna say uban nga nabiktima sa maong modus nga moguwa sad kuno para moreklamo sad kay biktima sad sa maong paagi nga gitagaan nag bayad wala sad mabayad.

**********

Ngano ba sad ka, Madam, nga misulod man ka ani nga kumpormiso? Dili lang ang tag-iya sa kwarta ang nahasol sa iyahang lisensya kay matud pa niya mibayad siya sa maong kantidad unya wala nimo ibayad. 

Dili lang karon siya ang nagproblema sa imohang gihimo sigun sa alegasyon  ni Mr. Antonio hasta na ikaw kay wala na unyay mopaproseso sa ilahang mga lisensya diha nimo. Gawas pa ana ug dili gyud mo magkahusay sa maong problema maabot mo ug korte sa maong hitabo. Daghan nang mga tigproseso sa mga lisensya nga akong nakaila diha sa City Hall ug dili ka mag amping nianang trabahua hayan gyud nga matental ka kay kwarta man kanang imohang gidala. Pero angay nga hinumduman nga sa higayun nga imong magamit unya dili na mailisan problema ang muabot nimo. Myentras naa pa sa barangay ang inyohang kaso husaya nga dili na maabot sa korte.

**********

Sa laing bahin, nag silent rally ang pipila ka myembro sa organisasyon nga gitawag ug Mata ng Brigada diha sa mismong atubangan sa estasyunan sa Brigada News FM. Adunay mga tulo ka plackards ang gipangkaptan sa nag rally.

Akong nahinabi ang usa sa mga grupo nila nga si Ms. Noemi Mahiya ug akong gipangutana ug unsa man gyud ang hinungdan nga nag silent rally man sila sa iyang mga kauban. Matud pa niya dili gyud unta kuno mapunta sa maong sitwasyon kung nakig-istorya pa unta ang ilahang Station Manager kanila.

Matud pa niya nga daghan ang mga t-shirt kuno nga nangawala nga ilaha kunong gipaprintahan. Ug ang mga batan-on pa gyud nga myembro sa Youth ng Brigada wala pa gyud kuno pakan-a bisag snaks na lang. Ug sumpay pa niya nga mibayad pa gyud ug diyes pesos matag t-shirt ang nagpa printa nga ang manager ra man diay kuno ang nagprinta.

Akong gipangutana ug usab ang mga nagrally ug nganong sila ra man nga nagpahungaw sa ilang gibatyag batok sa maong Station Manager? Tubag ni Ms. Noemi Mahiya nga usa ka ‘Ninja move’ kuno kini wala na lang sila manawagan sa uban pag apil.

Walay permit ang maong rally apan nakapananghid ang mga miapil niini. Hangtud nga may back-to-back sa pulis nga miabot ug gipabalhin sila sa atbang.

Akong gihinabi ang usa ka empleyado sa sulod didto sa istasyonan sa Brigada ug akong gipangutana ug pila man gyud ka t-shirt ang nawala? Tubag niya nga 12 ra ka buok ug giingnan na sila nga ihatag ang size kay ilisan ni Manager. Ug akong gipangutana ug wala ba diay pakan-a ang nanabang? Matud pa sa akong nahinabi nga dako nga bakak kay gipaka-on gyud na silang nanabang. 

**********

Pila ra man diay na ka t-shirt ang nawala ug naabot man sa karsada ang inyong agrabyo? Ug sa akong kaugalingon nga pagtan-aw natural lang nga mobayad mo bisag gamay sa nagprinta kay unsa man say ipaka-on niya sa nanabang?  Ug labot pa tag Php 30 na sa uban ang bayad sa pagpaprinta. Gamay ra man diay unta nga problema nga pwede ra ninyo maistoryahan. Nalipat lang ko pagpangutana ug wala bay gapaluyo aning inyong pagrally atubangan sa estasyunan sa Brigada?