Bantay Banat "Linug ug uban pa"

Bantay Banat
By Rics Cañisarez

Linug ug uban pa

            Pebrero 6 nabatyagan sa mga taga San Carlos ang 6.9 magnitude nga linog. Ingon man usab sa ubang lugar sama sa Dumaguete, Tayasan, Guihulngan ug sa tibuok Negros ug Cebu. Sa San Carlos pipila ka mga building ang naapektuhan kay ang mga kristal nga bintana nangapusgay. Didto usab sa Barangay Guadalupe, sigon sa report, siyam ka panimalay ang nangahagsa gumikan sa kakusog sa linog.

    **********

                Mga pila ka minutos naukay ang katawhan, mga nanimuyo duol sa dagat dala ang pamilya lakip na ang kinabag-ang molupyo sa dakbayan nanghimos padulong sa mga lugar nga layo isip pagpangandam kon mahitabo ang gikabalak-ang tsunami.

                'Tsunami scare' ang nakapaukay sa katawhan sa syudad. Mga ginikanan gisiguro ang ilang mga pamilya.

                Kinsa man ang dili mabalaka nga human kuno sa kusog nga linog dunay tidal wave kon tsunami nga moigo dinhi sa dakbayan? Ingon usab niini ang nahitabo sa uban nga mga lugar sama sa Cebu ug Negros Oriental ug dinhi sa Negros Occidental.

                After all it was just a tsunami scare! Pagka 6:15 sa gabie, nabatyagan na usab ang linog hinuon (salamat sa Kahitas-an) hinay ra kining gitawag ug aftershock.

                  **********

                Daku ang akong pasalamat para sa katawhan sa San Carlos sa atong mga public officials sa pagpanguna ni Mayor Ginggo Valmayor ug sa mga sakop sa San Carlos City Disaster Risk Reduction and Management Council nga diha-diha nangandam gyud sa mga sakyanan ug sa mga kinahanglanon sa katawhan kon simbako man gyud nga moigo ang wala paabutang katalagman.

                Ang nahitabo niadtong Pebrero 6, maoy timailhan nga dili gyud nato hikalimtan ang hugot  nga pag-ampo sa Kahitas-an aron malikay kita sa kadaut.

  **********

                Mo-ingon mo nga ang indigent fund walay gipili, mapa pro-administration o oposisyon man. Ang taga Barangay Refugio, Calatrava sigon sa kang Barangay Captain Carlito Porsuelo dili gyud maka-avail sa indigent fund tungod kay sila taga-oposisyon.

                Gani nangayo sya ug tabang sa atong bise-gobernador ug wala magmakuli mihatag ug sakyanan nga gamiton nga himuon nga ambulansya kon may pasyente nga idul-ong didto sa Provincial Hospital.                       

                Ang problema sa mga indigents kay kon mangayo sila ug barangay clearance pangutan-on pa kon nakabotar ka ba sa ilang mga kandidato kon lain ang imong gibotaran, luoy ka lang kaayo kay ang indigent fund ang tinuod lang, gihimo na nga taming sa politika.