After-effect na ba?

Bantay Banat

Ni Rics Cañisarez

               Kining gikataho nga pagliki (crack) sa bukid sakop sa Magpantay, Sitio Pano-ulan, Barangay Guadalupe nahitabo human niadtong linog niadtong Pebrero 6. Dili ko kabana-bana sa gitas-on sa maong liki sa bukid pero ang gilapdon mahimo nga kon mahulog ang karabao dili gyud kitaon ug gani ang mga tawo didto sa maong lugar nagtinabangay nga matabunan ang maong liki gumikan sa kahadlok nga mahulog ang ilang mga hayop nga karabao og kanding. Tungod niini, ang mga tawo na-alarma gyud pag-ayo niining pagliki sa bukid. Sigon sa akong paghinabi sa taga didto lawom gyud ang liki sa bukid.

                Hinu-on wala pasagdai sa atong lokal nga kagamhanan kay ang Disaster Management Council nagpadala na ug survey team sa engineering aron ma-survey ug ma-evaluate ang gitas-on ug giladmon sa maong liki (dili ordinaryong liki) diha sa bukid sa Magpantay ug ang  taga Mines and Geo-Sciences Bureau (MGB) ug ang Phivolcs na ang mo-determine kon critical ba gyud ang kahimtang aron ilikay ang mga pomuloyo diha sa Magpantay. Sigon sa akong nasayran nga ang apektado nga panimalay dili mag minus 40 ka pamilya.

                Unsa man kaha ni? Resulta ba kaha sa after shock?

Ang bukid sa Magpantay kuha gikan sa Highway

**********

                Gawas niini, duna say gikataho nga pagliki sa bukid diha sa Barangay Bagonbon diha kuno sa Sitio Walos, Inutusan ug Mabulao nga angay usab nga usisa-on sa Disaster Management Council. Gani sa atong mga igsuon diha sa kabukiran kon may mahimatikdan kamo nga pagliki sa bukid diha-diha i-report dayon sa atong mga public officials aron ma-aksyonan dayon.

**********

             Wala ba kaha makaliti si Barangay Kapitan Fred Salimbaga sa Guadalupe sa pagpapha sa ilang tresorera sa barangay? Aron kamo masayud sa nahitabo kon unsa ang hinungdan ngano nga kalit lang gipapha sa Janet Deocamos, barangay treasurer, kini gumikan kay sya gipasanginlan sa pagka-wala kuno sa kwarta sa barangay nga bale P 185,000.

                Matud ni Deocamos ang components nianang kwartaha mao ang Barangay Health Worker, tanod, lupon tagapamayapa, ug uban pa nga nagtrabaho sa barangay busa, matod pa niya, "Wala gyud kong mahadlok niana nga pasangil. In fact, gi-cleared man ko sa accounting ug treasurer office."

                 Sa ato pa, walay tulobagon si Deocamos kay 'all accounted for' man ang kwarta. Dugang pa niya nga iya gyung "gipatuloan ug luha kining ilang pagpaka-ulaw kanako ug sa akong pamilya pero, bisan pa man niini taas noo pa gihapon ako nga mo-atubang sa tawo kay sa tinuod wala koy nabulsa sa kwarta sa gobyerno."

**********

                Sa susamang kalambu-an, si Deocamos samtang sya pa ang tresorera sa barangay pareho sa uban, naka-loan ug kwarta sa usa ka financing institution nga ang co-maker mao ang ilang kapitan. Karon kay wala na man syay trabaho unsa man ang iyang ibayad? Nganong wala man usab makahuna-huna si kapitan niini no? Nga sya ra ba gyud ang co-maker. Magka problema na usab si kapitan niini da!

**********

                Daghan na karon ang nag-ingon nga ganahan na kuno sila mobasa sa NewsRecord kay awayon kuno. Salamat kaayo ninyo mga Sir/Ma’am!