Bisag karton lang

Pikpik sa Abaga
Ni Henry Sandoval

           Bisan pa man sa pagbalik sa normal nga kondisyon sa mga tawo human sa linog aduna pa gyud diay mga igsoon nato nga hangtud karon naa pa gihapon sa kahadlok tungod sa miliki nga bukid sa ilahang lugar.

       Mga 38 ka pamilya ang anaa mibakwit karon sa eskuylahan sa Pano-ulan Elementary School. Ang atong disaster chairman ang mimando kanila sa pagbakwit sa maong lugar tungod sa ka delikado sa ilahang panimalay. Sa akong paghinabi sa mga residente nga mibakwit sa eskuylahan nalipay sila sa tabang nga ilahang nadawat sa Lokal nga Gobyerno pinaagi sa City Social Welfare and Development Office.

                Apan nahadlok usab sila kay ang ilahang kahimtang matud pa nila mura silag ilaga. Ug panahon sa klase mangguwa sila atubangan sa maong eskuylahan. Ang pagkatulog usab sa ilahang mga anak nga sa karon gipang-ubo tungod sa kabugnaw sa semento nga molusot sa ilahang banig nga gihigdaan.  Hangyo unta sila sa ilahang barangay nga mahatagan sila ug karton nga masapaw sa ilahang banig. Kap, syaro bisag 200 lang nga mga basiyo sa karton nga mapalit makahatag na kanag kalipay sa maong mga pamilya. Ug panahon unya nga mamupo ka sa mga gipangtanom nimo sayon ra kaayo kay sila ra ang matagak sa punu-an padulong unya nimo.

Ningbakwit. Ang mga taga-Magpantay, Sitio Pano-ulan, Barangay Guadalupe, San Carlos City nagtapok gawas sa waiting shed nga nipa gawas sa elementaryang skwelahan nga ilang gibakwitan.

                Ang mga tawo nga atua karon sa maong eskuylahan dako sad kaayo ang ilahang pagpasalamat sa Head Teacher ug mga maestro nga atua didto nagtudlo sa kaayo nga ilahang gihatag kanila. Sa pagkakaron wala pa sila mahibalo kung kanus-a sila pabalikon didto sa ilahang lugar.

**********

                Nasayud ba kayha ang atong City Treasurer ani karon nga nagkuyanap nga mga I.D. sa mga Pedicab Driver nga walay mga Licensed O.R. number sa likod sa ilahang I.D. Akong amigo sa pantalan ang mitawag kanako tungod aning mga I.D. sa pedicab nga walay mga O.R number. Sa akong paghinabi sa pipila ka driver wala silay papeles nga gihatag basta lang mihatag lang sila ug P350 sa maong tig follow-up ug pagka sunod adlaw naa na dayun ang ilahang I.D.

Pastilan basig naa tay laing Treasurer's Office ani. Nga unta molukat kini sila ug sedula, barangayclearance, health certificate ug uban pa. Gi-unsa man ni pagkuhaa sa ilahang ID nga dili na man molukat ug mga clearances? Kinsa na man pud kayha ang ulo-ulo sa kamalo aning raket sa ID sa mga driver?

                Madam Treasurer, ug dili ni paagi sa polisiya sa pagkuha ug I.D. sa pedicab maayo siguro nga imohang sugdan pagpa-inspeksyon sa imohang mga tawo diha sa City Treasurer's Office.  Kining amo suhestiyon lang basig dili kini legal ug masumpo ug mailhan ang mga tawo nga responsable sa maong modus.