Mga kawatan

Pikpik sa Abaga

Ni Henry Sandoval

                Didto sa Big Tibuco niadtong milabay nga bulan gisaka ug kawatan ang balay nila ni Mr. & Mrs. Boy Mondero. Wa jud makamata ang tag balay. Matud pa ni Boy wala sya niadtong hitaboa tungod kay nitambong man sya sa iyang trabaho sa Ethanol. Pagmata sa iyahang asawa, matud pa, giyabyab pa sa salbahis nga kawatan ang ilahang mga habol sa ilahang kwarto. Wa gyud sila kamata ug nadala sa maong kawatan ang hapit P 10,000 ug ang tulo ka buok cellphone. Ang kawat matud pa sa akong amigo panginabuhi, apan kung madakpan maghilak ka dili kay isulod ka sa prisohan kun dili sa bun-og nga madawat.

                Diha sa dalan Carmona nahitabo na sad ang pagpanglungkab sa duha ka tindahan sa mga pagkaon sa manok ug sa baboy. Suki kini sa mga kawatan. Apan wa gyud nagmalamposon ang nanglungkab  kay ang yawe dili ra sa guwa hasta pud diay sa sulod. 

                Akong gisulayan ug pangutana ang barangay tanod nga anaa makita nato permi nga magpungko sa atubangan sa karaang Metro Bank. Akong gipangutana kung aduna ba syay nakita nga mga tawo nga nanglangkat sa mga yawe sa duha ka tindahan? Matud pa niya wa gyud kuno sya ka dipara kay ang iyahang  oras sa pag posting diha kana lang dayun manira ang mga tindahan ug mubalik lang sya pag posting panahon na sad sa pagpa ngabri sa mga tindahan. Sa mga tindahan siguro sya nagbantay nga anaa nahimutang sa Barangay 3. Sa iyahang paminaw kadlawon mitirada ang maong mga kawatan.

**********

                Natingala kaayog dako ang pamilya nga nakaluto sa pagkaon nga naka biktima ug 13 ka tawo nga gisakitan ug tiyan niadtong milabay nga Abril 2 apil na ang iyahang manghud nga mabdos. Matud pa niya nga sa dihang nagkahinabi kami sa asawa ug bana nga birthday diay sa iyahang anak ug mipalit sila ug karne sa baboy didto sa merkado para ilahang maluto ug maka hatag pud sya sa iyahang mga suod ug partidos nga silingan ra sad niya. Human sa iyahang pagluto iya kining giapud-apud sa iyang mga silingan. Ana sang gabhi-una nga ang 13 ka tawo nga nakaka-on gisakitan pag-ayo sa ilahang tiyan. Ang mabdos maoy gisiguro pagdala sa ospital ug ang uban gi sustiniran lang ug tambal sa guwa. Aduna pa gani ko naabtan nga batan-on nga luya kaayo ang mata.

                Tungod kay wala silay laing gidudahan nga nakasakit sa tiyan sa ilahang silingan giadto niya sa merkado ug gipangutana ang tag-iya sa baboy nga iyahang gipalitan kung ang maong karne sa baboy nga iyang napalit bahaw ba o unsa tong baboya. Dira ra sya kutob ug wala sya modetalye kanako ug unsay gitubag sa tag-iya sa tindahan sa baboy diha sa merkado. Basta nga ang mabdos nga akong napangutana kay nakaguwa na man sa hospital. Amoeba ang finding sa doktor.

                Dili kayha "you only live twice" natong baboya? Klaroha ninyo ug mopalit mo ug karne sa baboy. Kay naa ra bay sekreto anang uban nga ang baboy nga bahaw koloran ra sad ug pus-aw nga color pink. Unya ug imong tan-awon mura sad ug bag-o ra nga inihaw nga baboy.

**********

                Bisan pa man nga duna usahay oportunista nga mga tindero  dali kaayo nahibaw-an sa meat inspector nga si Mr. Itong Apuhin  nga dunay usa ka babaye nga sa iyang nakuha nga impormasyun gasuroy diha sa sulod sa Public Market sa Meat Section nangontrata ug karne sa baboy nga imported kuno nga gikan sa Cebu. Ug  dali kini niyang na monitor tungod kay duna say usa ka tindero ug baboy nga mitawag kaniya. Na kumpirma usab nako kay dunay kargador sa pantalan nga mihatag kanako ug impormasyon nga adunay karton nga gisakay sa Ceres gikan sa Cebu ug ang unod niini karne sa baboy. Dili lang mosulti ug kinsa ang midawat sa maong tagsa ka karton nga karne sa baboy. Matud pa ni Mr. Apuhin aduna na syay gi-monitor  nga iyahang gi suspetsohan nga mudawat apan gusto gyud sya nga sya gyud ang makadakop sa akto matud pa niya.