NewsRecord Weekly Publication

Pikpik sa Abaga

Ni Henry Sandoval

Hapit na!

Pila na lang ka bulan ang paabuton ug mulagda na sa COMELEC  ang mga musaad nga moserbisyo 24 oras kuno sa mga katawhan. Ang San Carlos usa sa mga talagsa-on nga lugar. Ang mga kandidato nga makasulod sa tiket sa administrasyun siguro ang kadaugan.

Ug kabalo ba mo nga ug mag P 30,000 ang bulan sa usa ka konsehal aduna siyay

P 360,000 sa usa ka tuig? Ug sa siyam ka tuig nga moserbisyo siya sa siyudad aduna na siyay makuha nga P 3.24M isip sweldo sa pagka konsehal. Wala pay labot sa mga bonuses nga iyahang makuha.

Angayan gayud unta nga mopili ang tawo apan walay choice kay nagkahiusang kusog sa mga adunahang yutaan ang atong giatubang ug politika na ang istoryahan. Ingon ani kadako ang sweldo nga ilahang makuha nga angayan usab nga ilahang balusan sa usa ka mauswagong San Carlos sa panahon na nga sila mamungko sa katungdanan. Unta tan-awon usab ang ubang mga professional nga naa ra sa daplin sa karsada nagpapatad na lang ug STL ug dili Jai-Alai para lang gayud maka kwarta nga ika suportar sa pamilya.

Aduna nay mga ngalan nga giistoryahan sa mga tapok- ilabi na sa kapehan nga mudagan hulip sa mga mupahuway na nga mga konsehal. Usa niini ang usa ka engineer nga kanhi maoy nagdala sa project sa terminal. Nahimo usab ni siya nga head sa task force sa panahon ni kanhi Mayor Bong Lacson.  Usa usab ka ngalan nga miguwa ang usa ka kapitan dinhi sa lungsod. May ngalan usab kining kapitana ug angayan usab kini nga mahimong konsehal sa siyudad. Aduna usab ngalan sa usa ka doktor nga maoy usa sa mga nominado nga masulod sa linya sa partido.

**********

Sa lungsod usab sa Calatrava murag natakdan sa San Carlos. Ngano? Sa among pakisusi didto sa mga tawo nga mahilig usab sa politika sa 40 ka barangay ang nagpungko karon nga mayor si Mayor Aracelli Somosa nakakupot sa 33 ka barangay. Ang pito ka barangay nga atua unta sa oposisyon nakuhaan pa gyud ug usa kaniadtong milabay nga Special Election sa Barangay Lipat-on nga diin naperdi ang mipungko nga kapitan sa maong barangay.

Unom na lang ang nabilin sa oposisyun ug karong bag-o aduna kami nakuha nga impormasyun nga sa unom adunay duha nga minug bali sa administrasyun. Upat na lang ang mabilin ug madayun kini.  Hangtud karon ang kanhi mayor sa Calatrava wala na gayud magpakabana sa politika. Ug mahitabo gayud nga dili manghilabot ang kanhi mayor sa Calatrava karon nga eleksyon mahimo nga masabot nga libre ang tanan nga kandidato sa pagkampanya sa iyahang lugar nga kontrolado usab niya. Ug mahitabo nga libre sona ang maong mga barangay mosamot nga motaas ang bintaha sa kandidato sa administrasyun. 

Bisan pa man sa ka swerte sa mga kandidato sa administrasyun madimalas pud ni sila ug gamay kay ang Filing of Candidacy karon nang Oktobre 2012. Ug di sad ni sila ka eskapo sa mga oportunista nga mga botante nga magsige ug balik-balik mangayo ug pinaskuhan. Pero sa akong paminaw andam ug tagana ang mga kandidato mo labnit sa ilahang kilid para sa mga kabus                 ug timawa.

Pagpasensilyo lang mo daan ug tag diyes para daghan ang ma grasyahan!

Ang nindot nga politikanhong kalihokan nga sadya ug makita gayud ang lihok sa kada grupo adto sa Lungsod sa Toboso, Escalante, ug Salvador Benedicto kay adunay mga kontra ang mga mayor nga nagpungko karon. Aning mga lugara malingaw ka ug maka tungkad sa baroganan sa mga politko nga magpapili kay daghan ang mga rally ug mupaathag ang mga kandidato sa ilahang plata porma de gobyerno. Ug matantiya na nimo ang konsehal nga mo number one sa pakpak lang sa mga tawo.